Inizio pagina - Home - Contattaci - Menu - Contenuto Pagina - Menu di Servizio

Associazione Pro Loco Faedis
 
contenuto pagina
Tu sês in: Pro Loco Faedis / Ce ufrissial il Teritori / I Cjistiei di Faedis

I CJISTIEI DI FAEDIS

Castelli di Faedis

IL CJISTIEL DI CUCAGNE

Castello di CucagnaAl è il 1027 cuant che il patriarcje Popon al concedè il permès a Odorì di Auspergh, nobil carinzian, di tirâ sù in Faedis un cjistiel, tal interni di un progjet plui complès, clamât “colonizazion aristocratiche”, che al previodeve la fortificazion dal Friûl par rindilu plui sigûr cuintri des invasions barbarichis.

Odorì di Auspergh al sielzè di fâ sù il propri cjistiel sul cuel di Cucagne, di li che al podeve dominâ la valade dal Grivò, lûc di passaç e di jentrade a la planure furlane e di Faedis.Il cjistiel al fo tirât sù, probabilmentri suntune fortificazion te Alte Ete di Mieç, par davuelzi un bon control sul percors da Forum Iulii (Cividât) a Glemone, intun lûc impenetrabil e che nol podeve jessi assediât.

Il complès, li che i lavôrs a son za indenant pal so recupar di bande dal Istitût pe ricostruzion dal Cjistiel di Chucco Zucco, al è caraterizât di une alte tor di forme cuadrade cuntune puartute sore jevade. No tant lontan e jere la domus fortificade, li che a son i mûrs e une grande cistierne.
Dai dâts cjapâts sù al somee che tal 1325 e vignì slargjade la domus residenziâl che, dut câs, un secul dopo, e fo bandonade insiemit al cjistiel cuant che i nobii di Cucagne, cussì clamâts plui tart i Auspergh, dal non dal cuel, si trasferirin tes lôr vilis a Roncjis, Faedis, Udin e Cividât.

Par rivâ al Cjistiel di Cucagne si va pal antîc troi de Ete di Mieç che al partìs dal Borc S. Anastasie, su la strade pal Cjanâl di Grivò a Faedis.

IL CJISTIEL DI ÇUC

Castello di ZuccoAi 13 di Novembar dal 1248, il Patriarcje Bertolt al concedè a Adalpretto di Cucagne il permès di tirâ sù un cjistiel sul cuel clamât "Rodingerius" sore di Faedis. Chest al fâs suponi che in chescj prins cent e cincuante agns di permanence a Faedis la famee Cucagne si sei ingrandide e deventade une vore siore.

Il cjistiel al vignì edificât, come che jere usance in chê volte, intun pont plui bas di chel precedent, scuasit intune forme di sumission rispiet al prin plui antîc, ma no par chel mancul impuartant. Il gnûf cjistiel, clamât di Çuc (colle), al fo stât in principi un possediment in comunion tra i nobii Cucagne, po daspò al vignarà cedût in vie definitive a un ram de famee stesse che e cjaparà il non omonim. Il gnûf complès, plui grant di chel di prime, al veve une plante articolade cun dople cente di muris e un fossâl une vore larc. Tal interni des muris a jerin lis tors, la domus fortificade, cualchi edifici abitatîf e ancje une capele cjistielane che ancjemò in dì di vuê al è pussibil amirâ.

Tal XV secul il cjistiel di Çuc, che al subì lis stessis sortis di chel di Cucagne, al vignì bandonât par plui comudis e ospitâls vilis de planure e simpri tal stes secul al fo brusât dai venezians. Chest cjistiel, come chel di Cucagne, in chest ultin secul al à vût une vore di dams soredut int timp de prime e de seconde vuere mondiâl.

Par diviers agns a son stâts fat dai lavôrs di recupar di bande dal Istitût pe ricostruzion dal Cjistiel di Chucco Zucco. Pal moment i lavôrs a son fers in spiete che un gnûf Ent al vierzi il cantîr par un definitîf recupar in viste de realizazion dal Parc Archeologjic de Tiere dai Cjistiei dai comuns di Atimis, Faedis e di Paulêt.

Al Cjistiel di Çuc si pues rivâ a traviers dal antîc troi de Ete di Mieç che al partìs dal Borc S. Anastasie, su la strade pal Cjanâl di Grivò, a Faedis.

IL CJISTIEL DI SOFUMBERC

Castello di SoffumbergoIl cjistiel di Sofumberc, tirât sù tal XI secul, al à la sô impuartance parcè che par tancj secui al fo stât la dimore dal Patriarcje di Aquilee. Il toponim Sofumberc al derive dal todesc de Ete di Mieç Scharfenberg che al significhe une mont a spiç o roche a spiç e di fat la culine, li che al è stât fat sù, e à chestis carateristichis.

Il teritori, di li che dut al dominave, al comprendeve Cjampei, Rascjà, Colorêt, Val e Cjanâl. A cause de sô distruzion, vignude tal 1441, par opare dai cividins, dal antîc cjistiel a restin dome lis fondamentis des tors, de cente e de domus residenziâl.

La antighe capele cjistielane, invezit, graciis ai numerôs lavôrs di restaur, e je ancjemò dute interie. Tal 1993 a vignirin davuelts dai sgjâfs archeologjics che a meterin in lûs diviers reperts. Tra chescj a ‘nd jerin numerôs fruçons di ceramiche pe mense e pal fûc cun interessants motîf decoratîfs, ogjets di bronç, pichis di frecis e elements di armadure, che a partegnin ai secui XIII-XIV.

Al cjistiel di Sofumberc si pues rivâ a traviers de vie Cjistielane a Cjampei, une laterâl de strade par Rascjà.