Inizio pagina - Home - Contattaci - Menu - Contenuto Pagina - Menu di Servizio

Associazione Pro Loco Faedis
 
contenuto pagina
Tu sês in: Pro Loco Faedis / Ce ufrissial il Teritori / Trois e Itineraris / Il Zir dal Comun

IL ZIR DAL COMUN DI FAEDIS


Chest al è il percors dal tradizionâl Zîr dal Comun che al ven davuelt ogni an intune des domeniis di Març. Si partìs de place di Faedis, metris 170 sul nivel dal mâr, pe gleseute di Sant Roc o pai Cjistiei, imbocjant dopo il troi che al rive fintremai a Porçûs, metri 683 sul nivel dal mâr. Pôc dopo il paîs si pues sielzi di passâ par Clap, m. 684 sul nivel dal mâr, e daspò lâ fintremai su la Mont Carnize. m. 981 s.n.m., o pûr continuâ intal troi che al puarte dret te mont.

Continuant si passe pe Mont Ianuar, m. 1005, par riva dopo a lis "famosis" malghis di Porçûs, m. 968 s.n.m., teatri dal tragjic fat vignût tal Fevrâr dal 1945. Daspò des malghis si continue pe Mont Spich, m. 924 s.n.m., e dopo lâ jù e rivâ te strade forestâl che nus puartarà a lis Farcadicis (lis Farcadicis a son une des zonis plui bielis dal comun: si trate di une valade, logade pôc plui sore di Cjaneule li che si pues lâ a traviers de "Boccheta" di Sant Antoni), di li si continuarà fintremai al confin di Stât e di li dongje si imbocjarà il troi Italie (nr. 744).

Dopo di vê lassât il troi Italie si larà dilunc di une schirie di trois che, sfiliant la cime de Mont Joanaz, m. 1167 s.n.m., nus puartarà te Baite omonime, m. 949 s.n.m., sot de Mont Caludranze, m. 974 s.n.m. Passade la baite si continuarà viers de Mont Sant Laurinç, m. 913 s.n.m., pôc sore de Val, si podarà sielzi se continuâ pe Val, m. 678 s.n.m., o par Pedrose, m. 754 s.n.m. Cualsisei sielte che si fasi, al sarà necessari cjapâ la strade comunâl che e puarte a Cuestelungje, m. 593 s.n.m. Di culì si cjaparà il troi che al puarte a la Mont Forchiai, m. 482 s.n.m. par lâ dopo injù a Rascjà, m. 179 s.n.m., e di chi inviâsi par Faedis, seguint Vie Cuarde.

Chest itinerari al da la pussibilitât di amirâ ad implen il panorame che a ufrissin lis montagnis di Faedis, particolarmentri sugjestîf di Val, Cuestelungje e Cjaneule. L’ecuipagjament necessari par frontâ chest percors al è une vore sempliç: baste vê un pâr di scarpons o pûr scarpis di trekking e, in câs di brut timp, si consee di puartâ une gjachete pal aiar o un Kway a seont de stagjon. La durade de spassizade e va da lis nûf a lis dodis oris.