Inizio pagina - Home - Contattaci - Menu - Contenuto Pagina - Menu di Servizio

Associazione Pro Loco Faedis
 
contenuto pagina
Tu sês in: Pro Loco Faedis / Ce ufrissial il Teritori / Trois e Itineraris / Intinerari te Nature

ITINERARIS TE NATURE DAL COMUN DI FAEDIS

Sentieri immersi nella natura Faedis

Il zîr al partìs a sielte dal troi pe gleseute di Sant Roc o pûr di chel che al mene ai Cjistiei. In ducj i doi câs si rive adore a cjapâ il troi che al puarte a Porçûs, m. 683 s.n.m. Pôc dopo di vê passât Porçûs si presentin dôs pussibilitâts. La prime e consist tal fâ un zîr pes Farcadicis (il Plan des Farcadicis e je une largje concje logade pôc sore di Cjaneule li che si va a traviers de “Bocchetta” di Sant Antoni. Cheste valade, traviersade dal torent Rieca, e ufrìs un paisaç e un ambient naturâl pardabon sugjestîf), par continuâ, daspò, par Val. La seconde pussibilitât, invezit, e consist tal indreçâsi a Val, passant par Clap e Cjaneule.

La prime alternative nus puarte a continuâ pe Mont Carnize, m. 981 s.n.m., superade cheste si inviarìn pe Mont Iauar, m. 1005 s.n.m., e daspò lâ dilunc pes famosis malghis di Porçûs, teatri dal tragjic event dal Fevrâr dal 1945. Daspò des malghis si indreçarìn viers de Mont Spich, m. 924 s.n.m., po dopo lâ jù e rivâ a la strade forestâl che nus menarà tes Farcadicis. Traviersade la valade o rivarìn a la “Bocchetta” di Sant Antoni m. 788  s.n.m., di chi o larìn jù viers Cjaneule par imbocjâ il troi par Val.

La seconde alternative, invezit, e previôt che la cjaminade e continui par Clap, m. 684 s.n.m., par continuâ dopo su la strade comunâl che e mene a Cjaneule, m. 669 s.n.m., li che o cjaparìn il troi par Pedrose e Val.

Cjapant duncje il troi par Val e rivâts a Pedrose, m. 754 s.n.m., si continuarà pe Mont Sant Laurinç, m. 913 s.n.m., di culì, lant injù a traviers i “Prâts de Glesie”, che a ufrissin un paisaç unic, si rivarà a Val, m. 678 s.n.m. La nestre cjaminade e continuarà par Cuestelungje, m. 593 s.n.m., a traviers de strade comunâl, po si continuarà pal troi che al puarte a Cjanâl dal Fier, li che si fermarà. Cheste escursion e dure tra lis siet e lis nûf oris e par frontâle cun plui comoditât al sarès miôr meti sù un pâr di scarpis di trekking o se us plâs di plui un pâr di scarpons.

I BOSCS DAI COMUNÂI

A meretin di jessi nomenâts ancje i “Comunâi”, logâts a ovest di Faedis. Chestis tieris, al timp dai Cucagne, a partignivin, come che si pues intuî, a la interie comunitât: ognidun al podeve fâ passonâ i propris animâi, racuei i lens o pomulis di bosc. Cheste zone e je ricje di vegjetazion e e da la pussibilitât di fâ cualchi biele spassizade, dentri tal vert e te cuiete.

Par rivâ ai "Comunâi" si cjape Vie Stentarie, a diestre dal Municipi, che nus guidarà dilunc di dute la zone fintremai a rivâ tal abitât di Bielezoie (in comun di Paulêt). I "Comunâi" a son traviersâts di numerôs trois e stradutis che a ufrissin dai percors alternatîfs. Nol è necessari vê un ecuipagjament particolâr par frontâ cheste cjaminade, ma se o vês miôr lâ pai trois e pes stradutis us conseìn une montadure sportive. La durade des spassizadis a variin in base a lis sieltis che si fasin. A puedin jessi di une miezore come ancje di cualchi ore.