Inizio pagina - Home - Contattaci - Menu - Contenuto Pagina - Menu di Servizio

Associazione Pro Loco Faedis
 
contenuto pagina
Tu sês in: Pro Loco Faedis / Ce ufrissial il Teritori / Trois e Itineraris / Trois Storics

TROIS STORICS DAL COMUN DI FAEDIS

Sentieri Storici Faedis

I trois fin culì presentâts a son stâts disbratâts e sistemâts graciis ai contribûts dal Obietîf 5B de Comunitât Europeane. Chescj trois a son inserîts ancje tes tabelis informativis e logadis in Place I Mai a Faedis e tal principi di ogni troi. Ogni troi al è stât segnalât cun scrupul par mieç di tabelis e indicazions precisis.

Prin Percors - Cjistiei di Çuc e Cucagne

Si partìs dal Borc S. Anastasie, m. 181 s.n.m. Chest borc, logât propri sot dai cjistiei, al à origjins al timp de costruzion dai cjistiei cuant che culì a jerin lis abitazions dai servidôrs e lis stalis, il so non al derive di une antighe glesie che vuê no je plui. La nestre cjaminade e scomence cul troi che, a partî de Ete di Mieç, e je la uniche strade par podê lâ ai Cjistiei di Çuc e di Cucagne. Dopo 15 - 20 minûts di cjaminade, sù par jù, o rivìn al Cjistiel di Çuc, m. 299 s.n.m., li che o podìn amirâ la gleseute dal XVI secul e in plui un panorame une vore biel. Continuant a traviers dal troi, dopo cirche une desene di minûts, o rivìn al Cjistiel di Cucagne, m. 357 s.n.m., li che la ricostruzion e je avonde indenant, particolarmentri sugjestive e je la maestose tor biel avuâl restaurade. Passât il Cjistiel di Cucagne, dopo cualchi minût, si rive a une crosere di trois li che si pues: continuâ la cjaminade lant sù par Porçûs; vignî jù a Poiane; continuâ viers di Faedis.

Lant jù viers di Poiane al è pussibil continuâ la cjaminade pai boscs fintremai a rivâ al Cjistiel di Partistagn sore dal Borc Faris in comun di Atimis. Viers la fin dal 2000 il Cjistiel di Partistagn, insiemit ai siei possediments, al passà a la famee Cucagne su ordin dal Patriarcje di Aquilee, par estinzion de cjasade. Continuant viers di Faedis, invezit, o continuarai pal troi che al mene a la gleseute di Sant Roc. (Tai lavôrs di restaur de gleseute al è saltât fûr un cicli di afrescs su Sant Zorç, datât tra il 1300 e il 1400, de scuele di Vidâl di Bologne) Dilunc dal troi si passe dongje dai rescj di une costruzion, che probabilmentri e faseve di tor di control tal periodi dai Cjistiei. Il zîr al dure, sù par jù, une ore e vincj minûts e no si à dibisugne di une vistidure particolâr, baste che e sedi sportive e comude.

Secont  Percors - Cjanâl di Grivò, Malghis di Porçûs

La cjaminade e tache a Cjanâl di Grivò, m. 228 s.n.m., li che o cjaparìn il troi par Gradiscjute, m. 364 s.n.m. Dopo di cheste tape o larìn dilunc pe gleseute di S. Madalene dal XIV secul, probabilmentri e je stade fate sù su lis ruvinis di un antîc fortin. La tape che e ven dopo e je chê di Clap, m. 684 s.n.m.; di culì o larìn indenant pal troi che al mene a la Mont Iauar, m. 1005 s.n.m. Dopo di cheste si indreçarìn viers des malghis di Porçûs, teatri dal tragjic event dal Fevrâr dal 1945.
A Clap si pues decidi ancje di slungjâ il percors di almancul une ore, lant viers di Porçûs. La cjaminade e dure, sù par jù, dôs oris e cuarante minûts; par frontâle in maniere plui comude al sarès miôr meti sù un pâr di scarpis di trekking o se us plâs di plui un pâr di scarpons. Rivâts tes Malghis si pues decidi ancje di continuâ viers de "Bocchetta" di Sant Antoni, cjapant il troi li che te imbocjadure e je la strade che e puarte fin a lis Malghis.

Tierç Percors - Stremiz, Cjaneule, Mont Joanês

Chest al è un troi dai plui vieris, une vore doprât in timp indaûr. Si partìs di Stremiz, m. 315 s.n.m., si continue pal troi che al mene a Cjaneule, m. 669 s.n.m. Di Cjaneule si continue viers de "Bocchetta" di Sant Antoni, m. 788 s.n.m., di culì si rive a la Farcadice, une Val di grant valôr naturalistic. Dopo de "Bocchetta" di Sant Antoni o lin dilunc pe Mont Joanês, m. 1167 s.n.m. La cjaminade e dure, plui o mancul, dôs oris e vincj minûts e par frontâle cun plui comoditât al sarès miôr meti sù un pâr di scarpis di trekking o se us plâs di plui un pâr di scarpons.

Cuart Percors - Cjaneule, Pedrose, Val, Mont Joanês

Chest itinerari al da la pussibilitât di preseâ miôr il paisaç che si pues amirâ da lis montagnis di Faedis. La cjaminade e tache a Cjaneule cjapant il troi par Pedrose, rivâts a cheste ultime localitât si pues continuâ o viers di Val, slungjant di un pôc la spassizade, o pûr viers de Mont Sant Laurinç. La mete che e ven dopo e sarà la Mont Joanês, a 1167 metris s.n.m. La durade de cjaminade e je, plui o mancul, di trê oris. Vistidure e scarpis adeguadis.

Cuint Percors - Cjanâl dal Fier, Cuestelungje, Rascjà

La cjaminade e scomence a Cjanâl dal Fier, une borgade sore di Faedis, che si rive a traviers de strade che e mene a Cjanâl di Grivò. L’antîc troi che al puarte a Cuestelungje al pues jessi cjapât a Cjanâl dal Fier disore, m. 204 s.n.m., o pûr a Cjanâl dal Fier disot, m. 188 s.n.m. Di cualsisei pont che si scomenci, il troi nus menarà drets a Cuestelungje, m. 593 s.n.m. Di chi o continuarìn pe Mont Forchiai, m. 482 s.n.m. Dilunc di chest troi, a metât strade tra Cuestelungje e la Mont Forchiai, si podarà sielzi di lâ jù pe strade forestâl, che si cjate a cualchi metri plui sot, rivant a la Ponca, une poce di aghe sul torent Grivò. Continuant pal troi, invezit, si rivarà a Rascjà, m. 179  s.n.m. La cjaminade e dure, plui o mancul, une ore e trente minûts e par frontâle cun plui comoditât al sarès miôr meti sù un pâr di scarpis di trekking o se o us plâs di plui un pâr di scarpons.

Sest Percors - Anel "Nel Ban"

Graciis al lavôr de Pro Loco di Sofumberc (soffumbergo@yahoo.it), dai abitants, dai ex abitants di Colorêt di Sofumberc, di Val e graciis ancje dal supuart furnît de Comunitât Montane Tor Nadison Cuei e de Bancje Popolâr di Cividât al è stât pussibil recuperâ e rindi praticabil un bocon impuartant di bosc che al vistìs lis culinis dal Comun di Faedis.

"Nel ban" e je une rêt restaurade di trois inte zone tra Colorêt e Val, tra il Comun di Faedis e Torean, li che il visitadôr al pues cjatâ il contat cu la nature, dut dentri intun grant cidinôr e te trancuilitât dal bosc. Il grât di dificoltât al svarie tra il nivel Turistic e chel escursionistic de scjale elaborade dal CAI. Al è ben segnalât, oltri a la segnaletiche convenzionâl a son in plui 18 tabelis. Il disnivel al è di 405 metris. Si consee di meti sù un pâr di  Scarpons alts e lizêrs e une buracje. I diviers percors sugjerîts a àn une durade medie di une ore e mieze, sù par jù. I trois si puedin percori dut l’an, visantsi che tai mês de Sierade e ven praticade la ativitât venatorie e che i trois a traviersin lis proprietâts privadis.